အာဇာနည်နေ့ တပ်လှန့်သံ

18-7-2009
ရန်ကုန်မြို့က မူလတန်းကျောင်းလေး တကျောင်းမှာ ဖြစ်ခဲ့တာပါ။ ၂၀၀၈-ခု ဂျူလိုင်လ (၁၈) ရက်၊ ကြာသပတေးနေ့မှာပါ။ အထူးသဖြင့် သုံးရက်ဆက်တိုက် ကျောင်းပိတ်မှာ ဖြစ်တဲ့အတွက် ကလေးသဘာဝ ပျော်ရွှင်တဲ့နေ့ပေါ့။ ဒီလိုနဲ့ ဆရာမလေး ဒေါ်သီတာ ကျောင်းတွင်းသို့ဝင်လာရာ ကလေးများကလဲ “မင်္ဂလာပါ ဆရာမ” လို့ ချစ်စရာ သံပြိုင် နှုတ်ခွန်းဆက် အရိုအသေပေးကြပါတယ်။ တဖန် ဆရာမကလဲ “မင်္ဂလာပါ ကလေးတို့” လို့ ပြန်လည် အသိအမှတ်ပြုရင်း စာသင်မဲ့ ဘောရှေ့မှာ ရပ်လိုက်ပါတယ်။ တဆက်ထဲ ဆရာမလေးဟာ သူမရဲ့ ကျောင်းသားကျောင်းသူလေးတွေကို မေးလိုက်ပါတယ်။
“မနက်ဖြန် ဘာနေ့ဆိုတာ သိကြရဲ့လား..”
“သိပါတယ် ဆရာမ..” လို့ အားတက်ဖွယ် သံပြိုင်ဖြေဆိုကြပါတယ်။
“ဒါဆို ဘာနေ့လဲ.. မနက်ဖြန်..” လို့ ဆက်မေးရာ..
“အာဇာနည်နေ့ပါ ဆရာမ..” လို့ ဖြေကြတော့ ဆရာမလေးလဲ အားတက်သွားပါတယ်။ ဒါ့ကြောင့်
“ဘာဖြစ်လို့ အာဇာနည်နေ့-လို့ ခေါ်တာရော သိကြရဲ့လား..” လို့ မေးပြန်ရာ..
“သိပါတယ် ဆရာမ..” လို့ အားတက်သရော ဖြေကြပြန်ပါတယ်။
“ဒါဆို ပြောပြပါဦး.. ဘာဖြစ်လို့ အာဇာနည်နေ့ ခေါ်တယ် ဆိုတာကို..” မေးလိုက်တဲ့အခါမှာလဲ ကလေးတွေက အားတက်သရော ဖြေလိုက်ကြပါတယ်။
“အဆိုတော် Rဇာနည်မွေး-တဲ့နေ့ဖြစ်လို့ Rဇာနည်နေ့-လို့ ခေါ်တာပါ ဆရာမ..” တဲ့။ ထိုအခါ ဆရာမလေး ဒေါ်သီတာခမျာ ဘာလုပ်လို့ ဘာကိုင်ရမှန်းမသိ ဖြစ်သွားရှာပါတော့တယ်-တဲ့။


ဒီအကြောင်းအရာလေးဟာ တကယ်ဖြစ်ပျက်ခဲ့တာပါ။ မိမိကိုယ်တိုင် နားနဲ့ဆတ်ဆတ် ကြားခဲ့ရလို့ စိတ်မကောင်းစွာ စာဖတ်ပရိသတ်တွေကို မျှဝေခံစား အသိပေးရခြင်းဖြစ်ပါတယ်။ ငါတို့တိုင်းပြည်မှာ အဲဒီလောက်တောင် ဖြစ်နေပါလားလို့ တွေးရင်း မချိတင်ကဲ ခံစားရပါတယ်။ ပူဇော် ထိုက်သူ ပူဇော်တာ မင်္ဂလာ-ဆိုတဲ့ “ပူဇာ စ ပူဇနေယျာနံ မင်္ဂလာ” ချို့တဲ့နေပါလား-လို့ တွေးပြီး ၀မ်းနည်းမိပြန်ပါတယ်။
တကယ်တော့ “ပူဇာ စ ပူဇနေယျာနံ” မင်္ဂလာ-ဆိုတာ “ရတနာသုံးပါး၊ မိဘ ဆရာသမားတို့ကို ပူဇော်ခြင်း-ဟာ မင်္ဂလာမည်တယ်” လို့ မိရိုးဖလာ ယုံကြည်ထားပေမဲ့ ဒီထက်ပိုတယ်ဆိုတာကတော့ အသေ အချာပါပဲ။ ဥပမာ စာရေးသူရဲ့ မိဘနှစ်ပါးဟာ စာရေးသူအတွက် မဟာကျေးဇူးရှင်ပေါ့။ သူတို့က မွေးဖွားပေး လို့ ဖြစ်လာတာလေ။ ဒါပေမဲ့ ကျန်တဲ့သူတွေအတွက်ကတော့ သာမန်အမျိုးသမီးပါပဲ။
ဟော.. ဗိုလ်ချုပ်အောင်ဆန်း..။ ဒီလိုပြောလိုက်တာနဲ့ ဘယ်သူဘယ်ဝါ-ဆိုတာ အထူးဖော်ပြစရာ မလိုတော့ဘူး။ စာရေးသူတို့ တိုင်းပြည်ရဲ့ လွတ်လပ်ရေး ပိသုကာကြီး။ ဗမာပြည်-ဆိုတာ ရှိနေသမျှ သူ့နေရာ (လွတ်လပ်ရေးပိသုကာ) ကို ဘယ်သူနဲ့မှ အစားထိုးလို့ မရဘူး။ ဗမာပြည်သူ/ ပြည်သားတိုင်းရဲ့ ကျေးဇူးရှင်။ မမေ့အပ်ရုံသာမက ပူကို ပူဇော်ရမှာ။ ဘယ်တိုင်းပြည်မဆို သူ့တိုင်းပြည်ကို လွတ်လပ်အောင် တိုးတက်အောင် တခုခု စွမ်းဆောင်ပေးတဲ့သူကို ဂုဏ်ပြုတာဟာ တကယ့် “ပူဇာ စ ပူဇနေယျာနံ မင်္ဂလာ” ကို ဖြည့်ကျင့်တာပေါ့။ ထို့အတူ သားလေး၊ သမီးလေး၊ ညီလေး၊ ညီမလေး၊ တူလေး၊ တူမလေး-စသည်စသည် စာမေးပွဲအောင်လို့ ဆုချတာ။ တခုခု လုပ်ပေးတာ ဒါလဲ “ပူဇာ စ ပူဇနေယျာနံ မင်္ဂလာ” ပဲ ပေါ့။
ကမ္ဘာကြီးကို ကြည့်လိုက်ဦး..။ ကိုယ့်တိုင်းပြည် လွတ်လပ်ရေးရအောင်၊ တိုးတက်အောင်၊ ဖွံ့ဖြိုးအောင်၊ လူသိများအောင် စွမ်းဆောင်နိုင်သူတွေကို ဂုဏ်ပြုတဲ့အနေနဲ့ သုံးစွဲတဲ့ ငွေကြေးမှာ သူ့ပုံရိုက်နှိပ် ထုတ်ဝေတာ၊ ကျောင်းစာမှာ စနစ်တကျပြဋ္ဌာန်းပြီး ကလေးတွေကို သင်ပေးတာ၊ တံဆိပ်ခေါင်းအဖြစ် ထုတ်ဝေတာ-စတဲ့ လုပ်ရပ်တွေဟာ “ပူဇာ စ ပူဇနေယျာနံ မင်္ဂလာ” မဟုတ်လို့ ဘာများဖြစ်နိုင်ဦးမှာလဲ။ အချို့နိုင်ငံတွေမှာဆို အားကစားအရာ ထူးချွန်သူတွေကိုတောင် ဂုဏ်ပြုတဲ့အနေနဲ့ ပြတိုက်မှာ ပုံတူထားပေး တာ-တို့ ဘာတို့။ တကယ့် ဂုဏ်ယူစရာပါ။
ဟော.. မိမိတို့ဆီမှာတော့ တမျိုး..။ ဗမာ့လွပ်လပ်ရေး ပိသုကာ ဗိုလ်ချုပ်အောင်ဆန်း-ကို ဂုဏ်ပြုဖို့ ဝေးစွ.. သူနဲ့ပတ်သက်တဲ့ သမိုင်းဆိုင်ရာ အချက်အလက်တွေကို စုံမှိတ်ပြီး ဖျောက်ဖျက်ဖို့ ကြိုးစားနေတယ်။ မယုံရင် ဗိုလ်ချုပ်အောင်ဆန်းရဲ့ ပုံကို ရင်ဘတ်မှာဖြစ်ဖြစ်၊ အိမ်မှာဖြစ်ဖြစ် ချိတ်ထားကြည့်ပါလား။ မသမာသူ လူတစုက လာရောက် ပြန်ပေးဆွဲ၊ ဖမ်းဆီး၊ ထောင်ချ၊ သတ်ဖြတ်ပါလိမ့်မယ်။ တချိန်က ဗိုလ်ချုပ် အောင်ဆန်းရဲ့ ပုံနဲ့ထုတ်တဲ့ ငွေစက္ကူအစား ကြက်သရေကင်းမဲ့တဲ့ ခြင်္သေ့နဲ့ အစားထိုးတယ်။ လူကို ကိုးကွယ်ရာကနေ တိရစ္ဆာန် (ခြင်္သေ့) ကို ကိုးကွယ်တဲ့ တိရစ္ဆာန်အဆင့်ထိ ကျသွားပါလေရော။ ရှက်စရာ ဘယ်လောက်ကောင်းလိုက်သလဲ။ “သူ့ဂုဏ်ချိုးဖျက် ကိုယ့်ဂုဏ်ပျက်” ဆိုတဲ့စကားကို မေ့များနေသလား။ သို့မဟုတ် အသိခေါက်ခက် အ၀င်နက်နေတာလား-လို့ မေးရမလို ဖြစ်နေပါတယ်။
အဆိုးဆုံးက ယနေ့ခေတ် ကလေးအချို့ဟာ “အာဇာနည်နေ့” ဆိုတာကိုတောင် “အဆိုတော် Rဇာနည် မွေးတဲ့နေ့” လို့ ဖြေနေတာကို ကြည့်ခြင်းအားဖြင့် တိုင်းပြည်ရဲ့ ပညာရေးဟာ ဘယ်ထိအောင် ထိုးကျနေတယ်-ဆိုတာ ဖော်ပြစရာ လိုမယ်တောင် မထင်တော့ပါဘူး။ ဒါ့ကြောင့် ခေတ်အဆက်ဆက်မှာ အဆိုးတကာ့ အဆိုးဆုံးခေတ်ကြီးကို ဖြတ်သန်းနေကြရတဲ့ လူကြီးလူငယ်၊ အလွှာ ပေါင်းစုံအနေနဲ့ “မင်္ဂလာ” ချို့တဲ့နေတဲ့ ပုဂ္ဂိုလ်၊ မိသားစု၊ အဖွဲ့အစည်း၊ တိုင်းပြည်အနေနဲ့ လောကီရေးမှာရော လောကုတ္တရာရေးမှာ ဘယ်သောခါမှ ကြီးပွားမှာ မဟုတ်ဘူးဆိုတာ “ပြောမယုံ ကြုံဖူးမှ သိ” ဆိုတဲ့ စကားအတိုင်း ဗမာပြည်သူ၊ ပြည်သားတိုင်း ခံစားနေကြရပါတယ်။
နိဂုံးချုပ်ရရင် ဗမာတမျိုးသားလုံး ဗမာပြည်အကျိုးအတွက် အတွင်းရော အပြင်ပါမကျန် “ဖက်ဆစ် စစ်ဝါဒီ” တွေကို အမြစ်ပြတ် သုဓ်သင်ရှင်းလင်းရမဲ့အချိန် တန်ရုံသာမက ကျော်လွန်နေပါပြီ။ ဒီ့အတွက် အတွင်းအပြင်၊ တောင်ပေါ် မြေပြန့်၊ အဖြူ အမဲ မခွဲခြားပဲ ညီညွတ်စည်းလုံးစွာနဲ့ “ဖက်ဆစ်စနစ်ဆိုး” အောက်က လွတ်မြောက်ဖို့ ရုန်းကန်ကြပါစို့-လို့ တိုက်တွန်းရင်း “အာဇာနည်နေ့” ကို ဂုဏ်ပြုအပ်ပါသတည်း။
နီသွေး
(ဂျူလိုင် ၁၉-ရက်၊ ၂၀၀၉)

အစအဆုံး..ကြည့်ချင်ပါက....

http://lanka-msma.blogspot.com/