“ နှစ် နှစ်ဆယ်ခရီး၏ ရိုက်ခတ်သံများ ”

၂၀၀၈ ခုနှစ်၊ ဒီဇင်ဘာလ ၁၃ ရက်၊ စနေနေ့ နေ့စွဲဖြင့်ရေးသော ဒေါက်တာသောင်းထွန်း၏ “ ဒေါ်အောင်ဆန်းစုကြည်၏ ရွေးချယ်မှု မရွေးချယ်မှု ” ဆောင်းပါးကို ဂါမဏိက ဘာသာပြန်ဆို မဇ္စျိမဝက်ဆိုဒ်တွင် ဖော်ပြသဖြင့် ဖတ်ခဲ့ရပါသည်။ ထို့ကြောင့် ဤဆောင်းပါးကို ရေးဖြစ်ပါသည်း။

ဗြိတိန်နိုင်ငံထုတ် ဂါဒီးယန်းသတင်းစာတွင် နိုင်ဝင်ဘာလ (၁၁) ရက်နေ့ပါ ကေသီစကော့ကလပ်နှင့် အဒြီယန်လဗီတို့ ရေးတဲ့ “ တကယ်တော့ ဒေါ်အောင်ဆန်းစုကြည်ဟာ ဒါလောက်သူရဲကောင်းကြီး မဟုတ်ပါ ” ဆောင်းပါးတွင် အမှားအယွင်းများ အတော်များများ ပါဝင်နေပါသည်။ ထိုအထဲမှ အထင်ရှားဆုံးအမှားများကို ထောက်ပြပါမည်ဟု အစချီကာ ဒေါက်တာသောင်းထွန်းက ချေပဆောင်းပါး ရေးပါသည်။ သူ၏ အဓိက ချေပချက်များမှာ…………..( မြန်မာ ဒီမိုကရေစီလှုပ်ရှားမှုအနေဖြင့် မိမိတို့ လှုပ်ရှားမှုကို မိမိတို့ ဖာသာပြန်လည် ဝေဖန် ပြစ်တင်ရန်နှင့် ဒေါ်အောင်ဆန်းစုကြည်ကို ပြန်လည်ဝေဖန်ပြစ်တင်ရန် စိတ်သန်နေကြခြင်းသည် လှုပ်ရှားမှု၏ ယိုယွင်းကျဆင်းမှုကို သက်သေပြနေသည်) ဤအချက်ကို ဒေါက်တာသောင်းထွန်းက ဂါးဒီးယန်းဆောင်းပါးရှင် နှစ်ဦး၏ မှားယွင်းသော အယူအဆဖြစ်သည်ဟု ပထမဆုံးရေးသားချေပထားတာ တွေ့ရပါသည်။

အဖွဲ့အစည်းအသင်းအပင်းများတွင် မိမိကိုယ်ကို ဝေဖန်ရေးနှင့် ခေါင်းဆောင်ကို ဝေဖန်ရေး လုပ်ရန်လိုအပ်လာပြီဟု စိတ်ဆန္ဒ ထက်သန်လာပြီဆိုလျှင် ထိုအဖွဲ့အစည်းနှင့် ခေါင်းဆောင်တို့တွင် ယိုယွင်းကျဆင်းမှုတွေ ရှိလာခြင်း၊ တခုခု မှားယွင်းလာပြီဖြစ်ခြင်းတို့ကြောင့် ဖြစ်သည်ဟုဆိုသည်မှာ အမှန်ပင် မဟုတ်ပါလား။ “ ခေါင်းဆောင်ပဲဖြစ်ဖြစ်၊ အဖွဲ့အစည်းတစုံလည်းပဲဖြစ်ဖြစ် အမှားအယွင်းနှင့် မကင်းနိုင်ကြပါ။ အပြုသဘောဝေဖန်ချက်တို့ကို လက်ခံပြီး ဟုတ်မှန်လျှင် လက်ခံဖို့ ပြုပြင်ဖို့သာရှိပါသည်။ ဝေဖန်ချက်၊ စွပ်စွဲချက် ဟူသည်မှာ ချစ်လို့ဖြစ်စေ၊ မုန်းလို့ဖြစ်စေ အဓိက မကျပါ။ မှားခြင်း၊ မှန်ခြင်းသာ အဓိက ဖြစ်ပါသည်။ ဒေါက်တာသောင်းထွန်းအနေဖြင့် ဂါးဒီးယန်း ဆောင်းပါးရှင်တို့၏ ဝေဖန်ရေးသားမှုအပေါ် မည်ကဲ့သို့ မှားယွင်းနေသည်ကို ဖော်ပြပြီး ရေးသားရန်လိုအပ်ပါသည်။

ဂါးဒီးယန်းသတင်းစာပါ ဆောင်းပါး၌ ဆောင်းပါးရှင်၏ ကိုးကားချက်တွေ ပါလာပါသည်။ ဤသည်မှာ…. ရန်ကုန်မြို့မှ လူကြီးပိုင်းအမတ်တဦးက “ ကျွန်တော်တို့ စွန့်လွှတ်အနစ်နာခံတာတွေ သက်သက်နဲ့ပဲ အောင်ပွဲတကယ် ရနိုင်၊ မရနိုင်ကို အလေးအနက်စဉ်းစားဖို့လိုပြီ ” ဟု ပြောကြောင်း၊ နောက်တယောက်ကလည်း “ လူကြိုက်များခဲ့တဲ့ အန်အယ်ဒီပါတီ လမ်းပျောက်သွားပြီ ” ဟု ပြောကြောင်း ရေးသားထားပါသည်။

ဤကဲ့သို့ ကိုးကားရေးသားချက်အပေါ် ဒေါက်တာသောင်းထွန်းက…. ဤအသံများမှာ အတိုက်အခံလှုပ်ရှားမှုကြီး၏ ပြိုကွဲခြင်း လက္ခဏာကိုပြရာမရောက်ဘဲ လွတ်လပ်စွာငြင်းခုံ ဆွေးနွေးနိုင်စွမ်းဟူသည့် အတိုက်အခံလှုပ်ရှားမှုကြီး၏ ခွန်အားကိုသာ သက်သေပြ ခြင်းဖြစ်ပေသည်ဟု ချေပထားပါသည်။ မည်သို့ဆိုစေ ဆောင်းပါးပါ ကိုးကားချက်သည် လူတိုင်းပင်လွယ်လွယ်နှင့် သဘောပေါက်ပါနိုင်ပါသည်။

“ ကျွန်တော်တို့ စွန့်လွတ်အနစ်နာခံတာတွေ သက်သက်နဲ့ပဲ အောင်ပွဲတကယ်ရနိုင်၊ မရနိုင်ကို အလေးအနက်စဉ်းစားဖို့လိုပြီ ” ဆိုသည့် ပြောဆိုချက်သည် ဒေါ်အောင်ဆန်းစုကြည်၏ ယုံကြည်ဆုတ်ကိုင်ထားသော လမ်းစဉ်ကို တိုက်ရိုက်ဝေဖန်ထောက်ပြလိုက်ခြင်း ဖြစ်ပါသည်။ ဤဝေဖန်ထောက်ပြသတိပေးချက်သည် လက်တွေ့အခြေအနေအရ ဘယ်နေရာမှာ မှားနေလို့လဲ။ သဘောတရားရော အချက်အလက်အရပါ မှားနေသည်ဟု ယူဆလျှင် ဒေါက်တာသောင်းထွန်း ထောက်ပြသင့်ပါသည်။ နောက်တခုက “ လူကြိုက်များတဲ့ အန်အယ်ဒီပါတီသည် ဘယ်လမ်းပေါ်မှာ ဘယ်လိုဆက်လျှောက်နေသည်၊ ရှေ့ကိုဘာတွေ ဆက်လုပ်မည်ဆိုတာတွေကို ဒေါက်တာသောင်းထွန်းတို့ သိပါသလား၊ သိလျှင်ချေပပြောဆိုရှင်းပြသင့်ပါသည်။

တွေ့ဆုံဆွေးနွေးရေးကို မရမချင်းကြေငြာချက်ထုတ်ပြီး တောင်းဆိုနေသည့် မူသည် အန်အယ်ဒီ လမ်းမပျေက်သေးပါဘူးဟု ယူဆလျှင်လည်း ယူဆနိုင်ပါသည်။ သို့သော် “ အန်အယ်ဒီ၏ အနာဂတ်သည် မှုန်ဝါးနေပါပြီ ” ဟု အမှန်ကိုအမှန်အတိုင်း ဦးဝင်းတင် ကိုယ်တိုင် ထုတ်ဖော်ပြောနေသည်ကို ဒေါက်တာသောင်းထွန်းတို့ နားလည်သဘောပေါက်သင့်နေပါပြီ။ နောက်နှစ်ပေါင်း (၂၀) လောက်အထိ စစ်အစိုးရက လိုက်လျှောမည်ပုံ မပေါ်ပါ။ ဒါကြောင့် ထွက်ပေါက်ရှာဖို့ဆိုတာထက် ဖောက်ထွက်ဖို့ကြိုးစားကြပါလို့ ဦးဝင်းတင်က လူငယ်များကို သတိပေးလိုက်ပါသည်။

ဒေါ်အောင်ဆန်းစုကြည်နှင့် ပတ်သက်၍ “ သူမသည် ပျော့ပြောင်းလိုက်လျှောမှုထက် ခေါင်းမာမှုကြောင့် နိုင်ငံတကာတွင် ထင်ရှားကျော်ကြားသည်၊ ” “ အဖမ်းခံရပြီးနောက် ငြိမ်သွားသည် ” သူမ၏ တိုက်ပွဲမှာ တရားထိုင်ကမ္မဋ္ဌါန်း တိုက်ပွဲအဖြစ်သို့ လွှဲပြောင်း သွားပုံရသည်။ သူမ၌ နိုင်ငံရေး နလဗိန်းတုံးဖြစ်ခြင်းနှင့် မာနကြီးဘဝင်မြင့်သည့် အကျင့်စရိုက်ရှိခြင်း ဟူသော ချုို့ယွင်းချက်ရှိသည်ဟု ဆောင်းပါးရှင်များကဆိုသည်။

ဤအချက်နှင့် ပါတ်သက်၍ ကျွန်တော့်အမြင်ကတော့ ဒေါ်အောင်ဆန်းစုကြည်သည် နိုဗယ်ဆုကို ထိုက်ထိုက်တန်တန်ရရှိပြီး ထင်ရှားကျော်ကြားခြင်းဖြစ်သည်။ ပျော့ပြောင်းမှု၊ ခေါင်းမာမှုနှင့် မဆိုင်ပါ။ ပျော့ပြောင်းခြင်း၊ ခေါင်းမာခြင်း တခုခုကို နေရာတိုင်း တရားသေဆုတ်ကိုင်ထားခြင်းအတွက် နိုင်ငံရေးမှာ အောင်မြင်ခြင်း၊ ကျဆုံးခြင်းများ ရှိနိုင်ပါသည်။ ဒါကိုလည်း နိုင်ငံရေး၏တိုးတက်မှု၊ ကျဆုံးမှုနှင့်သာ တိုင်းတာနိုင်ပါသည်။ ယခုထိတော့ မြန်မာအတိုက်အခံတို့၏ နိုင်ငံရေးမှာ အကြီးအကျယ်ကျဆုံးခန်းပဲ ဖြစ်နေပါတော့သည်။

“ သူမ၌ နိုင်ငံရေး နလဗိန်းတုံးဖြစ်ခြင်းနှင့် မာနကြီးခြင်း၊ ဘဝင်မြင့်သည့်အကျင့်စရိုက်ရှိခြင်း ” ဟူသော ချို့ယွင်းချက်ရှိသည်ဟူသော အချက်သည် ဆောင်းပါးရှင်များ၏ ယေဘူယျဆန်သော စွပ်စွဲချက်ဖြစ်ပါလိမ့်မည်။ ဒေါ်စု၏ တိုက်ပွဲပုံစံသည် မဟတ္တမဂန္ဓီ၏ အကြမ်းမဖက် သည့်နည်းနှင့် အလွန်တူလွန်းပါသည်။ သို့သော် ဒေါ်စုသည် ဂန္ဓီမဟုတ်သလို စစ်အစိုးရသည်လည်း အင်္ဂလိပ်အစိုးရမဟုတ်ပါ။ အချိန်ကာလ သည်လည်း ဖက်ဆစ်၊ နာဇီနှင့် မဟာမိတ်တို့ရဲ့ တိုက်ပွဲကြီးကာလမျိုး(ဒုတိယ ကမ္ဘာစစ်ကာလမျိုး) လည်း မဟုတ်တော့ပါ။ ယနေ့ကာလသည် စစ်အေးခေတ်ပြီးဆုံးပြီး အကြမ်းဖက်အစွန်းရောက်၊ ကွန်မြူနစ်လက်ကျန် အရှေ့မျှော်ဝါဒကို လက်ခံလာကြသူများနှင့် ဒီမိုကရေစီ အနောက်အုပ်စုတို့၏ ရင်ဆိုင်ယှဉ်ပြိုင်ရေးကာလပင် ဖြစ်ပါသည်။ ဤအခြေခံကွာဟ ချက်များအပေါ် ဒေါ်စု ကောင်းကောင်း နားလည်ခြင်း ရှိမရှိ ဆိုတာကတော့ အချိန်က သက်သေပြနေပါသည်။ “ မာနကြီးသည်၊ ဘဝင်မြင့်သည် ” ဟူသောအချက်သည် ဝေဖန်သူကိုယ်တိုင်က ထိတွေ့ဆက်ဆံဖူးပြီး၊ အချစ်အမုန်းကင်းသော စိတ်ဖြင့် ဝေဖန်မှာသာမှန်ပါလိမ့်မည်။

ဒေါက်တာသောင်းထွန်း၏ ချေပဆောင်းပါးတွင် “ စစ်အစိုးရ၏ သံမဏိအုပ်ချုပ်ရေးအောက်တွင် ပြည်သူလူထုနှင့်လည်းကောင်း၊ ပြည်သူလူထုကို ဒီမိုကရေစီနည်းကျ ကိုယ်စားပြုထားသူတို့နှင့်လည်းကောင်း ထိတွေ့ဆက်ဆံနိုင်ရန် လုံးဝမဖြစ်နိုင်ပါ ” ဆိုသည့် အချက် သည် အလွန်မှန်ကန်ပါသည်။ “ ယင်းသို့သော အနေအထားတွင် ခိုင်မာတာရှည်ခံသော ပေါ်လစီကို သေသေချာချာဖော်ထုတ်နိုင်မည် မဟုတ်ဘဲ ပြေးရင်းလွှားရင်း ဖော်ထုတ်ရသည့် ပေါ်လစီသာ ဖြစ်နိုင်ပါမည်။ မဲဆန္ဒရှင်များ(သို့မဟုတ်) အောက်ခြေထုများနှင့် ထိုက်သင့်သော ညှိနှိုင်းတိုင်ပင်မှုပင် မပြုနိုင်ဘဲ ဖော်ထုတ်ရသည့် ပေါ်လစီ၊ အဓိပ္ပါယ် အတိအကျပြောရလျှင် ဒီမိုကရေစီမကျသည့် ပေါ်လစီသာ ဖြစ်ပါ လိမ့်မည် ” ဟူသော ဒေါက်တာသောင်းထွန်း၏ ဖော်ပြချက်ကတော့ နိုင်ငံရေးမှာ သဘာဝမကျစွာ ကာကွယ်မှုဟု ယူဆပါသည်။ ဒေါ်စုကို အချုပ်ခံနေရချိန်မှာ ဒေါ်စုအနေဖြင့် မည်သည့်ပေါ်လစီမျိုးကိုမှ ချမှတ်မပေးနိုင်ပါ။ အဖွဲ့ဝင်လူကြီးများနှင့် တိုင်ပင်ခွင့်မရှိ၍ ဖြစ်ပါသည်။ သို့သော် အန်အယ်ဒီမှာ အခြေခံမူမှာ ရှိရပါလိမ့်မည်။ ဒေါ်စုအချုပ်ခံနေရလျှင် ဘာလုပ်မည်နည်း။ ဒေါ်စု မရှိလျှင် ဘာဆက်လုပ်ကြမည်နည်း။ ဒီမေးခွန်းသည် အန်အယ်ဒီ၏ အခြေခံမူကိုမေးနေပါသည်။ ဒေါ်စုကတော့ သူအဖမ်းခံရလျှင် ကျန်လူတွေ ဘာဆက်ပြီးလုပ်ရမည်လို့ အခြေခံမူတွေရှိနေတယ်လို့ မပြောခဲ့ဘူးလား။ ခိုင်မာတဲ့ အန်အယ်ဒီ အခြေခံလမ်းစဉ်ဆိုတာ ဘာလဲ။ ဒေါက်တာသောင်းထွန်းကော ဖြေနိုင်ပါ့မလား။ ဖြေနိုင်လျှင် အန်အယ်ဒီ၏ ရှေ့ဆက်လုပ်ရမည့် ပေါ်လစီ ဖြစ်လာပါလိမ့်မည်။

ဂါးဒီးယန်းဆောင်းပါးရှင်များအနေနှင့် ဒေါက်တာသောင်းထွန်းပြောသလို “ အမျိုးသားသူရဲကောင်းမတဦးကို သိက္ခာချရေး ရည်မှန်းချက်ဖြင့် အသိအမြင် ဗဟုသုတချို့တဲ့စွာ ဝါးလုံးချီးသုတ်ရမ်းသည် ” ဟုဆိုလျှင် ထိုဆောင်းပါးရှင်များ အနေနှင့် လုံးဝမကောင်းပါ။ မလုပ်သင့်ပါ။ ဒီလိုမဟုတ်ဘဲ သူတို့ရေးသားမှုတွေက သဘာဝကျပြီး မြန်မာနိုင်ငံရေးရဲ့ ချို့ယွင်းချက်တွေကို မှန်မှန်ကန်ကန် ထောက်ပြခြင်း ဖြစ်ပါက လက်ခံပြီး ပေါ်လစီကို အကောင်းဆုံးဖြစ်အောင် ပြုပြင်ရန်ပင်ဖြစ်ပါသည်။

နောက်ဆုံးအနေနှင့် ဒေါက်တာသောင်းထွန်းက (၁၁) ရက်နေ့ထုတ် ဂါးဒီးယန်းသတင်းစာဆောင်းပါးက မည်သို့ပင် ဆိုစေကာမူ ကျွန်တော်တို့အနေဖြင့် ကိုယ့်လမ်းကိုယ်ဆက်လျှောက်မည်သာဖြစ်ပါသည် ဟု ဆိုပါသည်။ ဒီနေရာမှာ အန်အယ်ဒီကတော့ အနာဂတ်မှုန်ဝါးနေပါသည်ဟု ပြောနေချိန်တွင် ဒေါက်တာသောင်းထွန်းတို့ NCGUB က ကိုယ့်လမ်းကိုယ် ဆက်လျှောက်မည် ဆိုသည်မှာ ဘယ်လမ်းကို ဆိုလိုပါသနည်း။ NCGUB သည် ၁၈ နှစ်တာ လမ်းလျှောက်နေသည်ကတော့ အမှန်ပင်ဖြစ်ပါသည်။ သို့သော် ဘယ်ကို လျှောက်နေသည်။ ဘယ်ကိုဦးတည်နေသည်ဆိုတာ ကတော့မရှင်းပါ။ ဥပမာအားဖြင့် ဝါရှင်တန်လား? ပီကင်းလား? ။ ။



ဦးဖိုးသာအောင် (နော်ဝေ)