ဘာသာရေးပွဲများကို အာဏာပိုင်များ ပိုမို တင်းကျပ်လာ

ဓမ္မကထိက ဆရာတော်ကြီးများ၏ တရားပွဲများတွင် အာဏာပိုင်များမှ စောင့်ကြည့်ခြင်း၊ တရားဟောမှု ကန့်သတ်ခြင်းများကို ရွှေဝါရောင်လှုပ်ရှားမှု နောက်ပိုင်းမှစတင်ကာ မြန်မာနိုင်ငံတွင် ယနေ့အထိ ပိုမို တိုးမြှင့် လုပ်ဆောင်လာသည်။

ပြီးခဲ့သည့်နှစ် စက်တင်ဘာလအတွင်းက သံဃာတော်များ၏ လှုပ်ရှားမှုကို စစ်အစိုးရက အင်အားသုံး နှိမ်နင်းခဲ့ပြီးနောက် ကျော်ကြားသည့် ဆရာတော်များက တရားပွဲများတွင် နိုင်ငံရေးနှင့် ပတ်သက်သည့် တရားများ ဟောကြားမည်ကို စိုးရိမ်သဖြင့် အနီးကပ် စောင့်ကြည့်ခြင်း၊ နိုင်ငံရေးနှင့် ဆက်နွယ်သည်များ မဟောကြားရန် တားမြစ်ဟန့်တားမှုများ ပြုလုပ်နေခြင်း ဖြစ်သည်။

"လက်မှတ်ထိုးခဲ့ရတာက စီးပွားရေးတွေ မဟောရဘူး၊ လူမှုရေးတွေ မဟောရဘူး၊ နောက် ပညာရေး မဟောရဘူး၊ နိုင်ငံရေးလည်း ပါတာပေါ့။ ရိုးရိုး မေတ္တာတရားတို့ ၀ိပဿနာတရားတို့ပဲ ဟောရမယ်တဲ့လေ။ အဲဒီတော့ ရိုးရိုးလေးတွေပဲ ဟောတယ်လေ။ ကျန်တာတွေတော့ မဟောပါဘူး။ တခြားဆရာတော်တွေလည်း မဟောဘူးလေ" ဟု တွံတေး ဆရာတော် ဦးဣန္ဒက က မဇ္ဈိမကို မိန့်ကြားသည်။

ပြီးခဲ့သည့်နှစ် စက်တင်ဘာ သံဃလှုပ်ရှားမှု နောက်ပိုင်းတွင် ဓမ္မကထိက ဆရာတော်အချို့က အာဏာပိုင်များ၏ လုပ်ရပ်များကို တရားပွဲများတွင် ထောက်ပြခြင်းများ ပြုလုပ်ခဲ့သော်လည်း ယခုနှစ် သီတင်းကျွတ်ပွဲတော်အပြီး အောက်တိုဘာလလယ်မှ စတင်ကာ တရားပွဲများတွင် နိုင်ငံရေးနှင့် ဆိုင်သည်များကို ဟောကြားခြင်း မပြုရန် ၀န်ခံလက်မှတ်များ ရေးထိုးခိုင်းခဲ့ခြင်း ဖြစ်သည်။

ပြီးခဲ့သည့် တပတ်က တွံတေးတွင် ပြုလုပ်သော တရားပွဲတခုတွင် တရားမဟောရန် မယက ဥက္ကဌမှ တားမြစ်ခဲ့ပြီး တရားပွဲလာ တကာ၊ တကာမများက ညှိနှိုင်းတောင်းပန်မှ အချိန်နောက်ကျကာ ဟောကြားခွင့် ရခဲ့သော်လည်း စောင့်ကြည့်မှုများ ရှိခဲ့သည်။

အလားတူ ရန်ကုန်မြို့တွင်လည်း တရားပွဲများ ပြုလုပ်ရန်အတွက် အာဏာပိုင်များထံမှ အခွင့်ပါမစ်များ တောင်းရသည်။ အခွင့်မရလျှင် တရားပွဲများ မလုပ်ရပေ။

ရန်ကုန်တိုင်း လမ်းမတော်မြို့နယ် ဆွမ်းသိမ်းအောင်တရားပွဲ စီစဉ်သည့် ဓမ္မာရုံတခုမှ ဂေါပကအဖွဲ့ဝင်တဦးက "တရားပွဲတပွဲ လုပ်ဖို့ရာကို စတိတ်ရှိုးတပွဲလုပ်ဖို့ ခွင့်ပြုချက် ယူရသလိုပဲ ယူရတာ။ ရ၀တ ထောက်ခံချက်ကစပြီး မြို့နယ်၊ ခရိုင်၊ တိုင်း အေးချမ်းဖွံ့ဖြိုး ကောင်စီရုံးအထိ တလလောက်ကြိုပြီး အဆင့်ဆင့် ခွင့်ပြုချက် ကြိုတင်ယူရတာ။ ဒါတောင် သူတို့ မပေးချင်ရင် ဘာမှ မေးလို့မရဘူး။ ခွင့်မပြုနိုင်ဘူးဆိုတာပဲ ပြောတာ" ဟု ပြောပြသည်။

ရန်ကုန်မြို့တွင်း ၀ါတွင်းကာလ ဆွမ်းသိမ်းအောင်ပွဲနှင့် ကထိန် ဆွမ်းလောင်းပွဲများ၏ အထူးတရားပွဲများတွင် ရဲ၊ ထောက်လှမ်းရေးများ၊ ကြံ့ခိုင်ရေးများနှင့် စောင့်ကြည့်မှုများ ပိုမိုပြုလုပ်လာသည်ဟု မြို့ခံများအဆိုအရ သိရသည်။

ပြီးခဲ့သည့် စနေနေ့ညက စမ်းချောင်းမြို့နယ် မြေနီကုန်းရှိ ဆွမ်းလောင်းအသင်းတခု၏ တရားပွဲတခုသို့လည်း အာဏာပိုင်များက လာရောက်စောင့်ကြည့်ကာ သတင်းပေးပို့နေကြသည်ကို တွေ့ရှိခဲ့ရကြောင်း တရားပွဲ သွားရောက်သူ အမျိုးသားတဦးက ပြောသည်။

စမ်းချောင်းမြို့နယ်မှ လူငယ်တဦးက "တရားပွဲကိုဗျာ ဘာနိုင်ငံရေးပါလို့လဲ။ သူတို့ကျတော့ အပြောအဆိုခံရမှာ သိပ်ကြောက်ပုံပဲ။ ဓမ္မက အမှားကိုတော့ ထောက်ပြဝေဖန်မှာပဲ။ ဒါပေမဲ့ အခု ကျနော်တို့ တရားပွဲကတော့ ဆရာတော်ကြီးတွေက တရားတော် အနှစ်သာရ ပြည့်ပြည့်ပဲ ဟောသွားတာပါ" ဟု မဇ္ဈိမကို ပြောသည်။

စစ်အစိုးရ၏ လုပ်ရပ်များကို တရားတော်များတွင် ထည့်သွင်းဟောပြရင်း ဝေဖန်လေ့ရှိသော ဆရာတော်ကြီးများ၏ တရားပွဲများတွင် ရဲထောက်လှန်းရေး (SB) များကို အများအပြား တွေ့ရလေ့ရှိသည်ဟု ရန်ကင်းမြို့နယ် ဒေသခံတဦးကလည်း ပြောဆိုသည်။

တွံတေး ဆရာတော်က "အရင်တုန်းက ဟောတာတွေမှာက သူတို့တွေနဲ့ မလွတ်ကင်းတဲ့ ဟိုဟာလေး နည်းနည်း ဒီဟာလေးနည်းနည်း ပါတာပေါ့။ သူတို့က ကြောက်တာ တကာမကြီးရယ်။ ဘုန်းဘုန်းတို့က မဟောတာ ၅ လလောက် ရှိပါပြီ။ မလွတ်မကင်းတော့ မဟောပါဘူး တကာမကြီးရယ်။ သူတို့က ကြောက်ပြီးတော့ တားတာပါ" ဟု မိန့်ကြားလိုက်သည်။

စက်တင်ဘာ သံဃာ့ လှုပ်ရှားမှုနောက်ပိုင်းတွင် သီတဂူဆရာတော်ကြီး ဦးဥာဏိဿရ၏ ဧကရာဇ်မင်းကြီး ဘ၀နိဂုံးနှင့် လူမိုက်တို့သွားရာလမ်း ဆိုသော တရားခွေ နှစ်ခွေ ထွက်လာပြီးသည့်နောက်တွင် ဆရာတော်၏ တရားပွဲများကို အာဏာပိုင်များက ခေတ္တ ပိတ်ပင်ခဲ့သေးသည်။